| تبليغات | X |
دورد ياشينداكن اؤلوم آياغينا دؤشنديم
آنامدان خاطير
آنجاق،
اؤلوم آننامادي مني
دؤرد ياشيمداكن
يالنيز بير يئددي ياشيندا باجي ديرك اولدو چارداغيما
يئل قاباغيندا
بوسبوتون اونودولدو دونيا بير دلي قانلي شاعيرين
گؤزونده
گوندوزلر سس سمير
گئجه لر قارالتيلار قووالادي
آتامي!!
من يالقيز يالقيز سوروندوم
اوشاقليغيمي
چاتلاميشدي چيچه ييم
سوروندوم،
يئددييه قدر
سكگيزينجي گونشي ساياركن
دويغولاريم سؤزجوكلرين گئنيشليييينده
چيچكلندي
تارلالار آنا تكين بويوتدو مني
ياشيل كؤكسونده!
بويودوم يالنيز ايتگين بير سئوگييه
ساري
آنجاق
دوشوندوم قاراني
دوشوندوم آغي
سولوخموش بنيزي
سؤلموش دوداغي
و مينلرجه سورغولارين باسقي سيندا
سيخيلديم
سويوم سوزوله نه قدر
من كيم ايديم؟
و كيم ايدي؟ من، بؤيله دار باخيشلارين گؤزلويونده
اينجلميش
هاردا اوتوزدوم شن ليك لريمي؟
و اوتوزدوغوم گونلري آختاريركن
ياشاييشين چؤللويونده
قارانليق بير اوچوروما قارشي لانديم
اورادان باشلاندي سوچسوز
جزالانماغيم
قاپ- باجاميزدا بايقوشلار بانلادي
كيمسه شام يانديراممادي بيزيم اودادا
آنامين يايليغين يئل آپارميشدي
شيديرقي دولو ياغيردي
ماهني لاريما
ديكسينركن اوشودوم
ديليم دوتولاراق آنامين لايلاسي
جالاندي
بئينيمين چاناغيندان
قيسير بولودلارين نفسينده
كئهلديم
ياغمورلار گؤينه دي دنيز ليييمده
يوللاردا يورولاراق
چؤللرده دريلديم
پاييز قارقالاري يئلك سپدي
يوللاريما
بويودوگوم قدر قارالديم!
داغلارين سوسوزلوغوندا اري يركن
باغلارين پاييز ليغيندا
سارالديم
چيناردان دريلميش بير يارپاق
تكين
ياباني يئللرين اوغولتوسوندان
تير تيكانا آرخالانديم.
***
ائلات قيزينين سهنگي سيننده
بولاغ يولوندا
اوره ييم جالاناراق گؤزلريم آسيلدي
دره يه ساري
قارا بير داشا سؤيكه نركن
دوروب باخيرديم
قيز ايسه قيرميزي يايليغينن
گؤزون سيليردي
اينديسه قولاغيمدادير
سهنگين
سينماق سسي.
سنین دوداقلاریندا یام یاشیل
سوکوت گووه ریب
من،
او گوجه ریشین داوامیندا
بیر آجیمتیل دینجه لیش قدر
سارالمیشام
بیر ایچیم گونش بوشالتسان
کوکومدن گووه رر باغیرتی فیدانلاری
سیرا – سیرا
و سن
بیر چاناق گونش ایچرسن!؟
بیرنفس ایلدیریم دادیزدیرا بیلسن
بیر قاتار بولودو
بیر اوتوروما تامسینارام.
دنیزین گوبهیینده
ترانه بیتیرهرکن
اولدوزلارا اوکیان هاواسینی
چالدیرارام.
گل،
گل شیمشه یینی
دادیزدیر خوروزلارا
قیرمیزی بی بار تکین
قیزیخیب بانلاسینلار
اویانیش ماهنیسینی
بیر یاری گئجه
سوکولسون یوخوموز
گوزلریمیزدن،
چیلله گئجهسی؟!
