| تبليغات | X |
دايانمادان سوووشور اوتوبوسلار
دوراق آياقسيز باشماقلار، توكولوب يئره
قالديريمدا گؤيرن اؤگي آنيلار
شيپ شيرين، آپ آجي
هرنه، اؤزيئرينده
يالنيز، بيرماشين ياشيل يارپاقلي
خياوان اؤزيئرينده
سوووشان بيريسيده،
دامارلاريمدا بوغلايير سوپ سويوق...
قولاقلاريمي اولايير راديو راپورتلار
بو سس، سئوگي يوخ اينتهاردا دئييل!
خوش گليرهرنه، اؤزيئرينده
فوتوشكيللر قاچيشمادا قاريشيق،
بورا ايل دونومو دوراغي،
كيميسي اوستده كيميسي آلت قاتدا اؤزيئرينده
دانيشديغي يوخ، دانيشانماديغي اؤنمليدير اؤزيئرينده!
زامان بيزي سوووشور،بيز، بير بيريميزي،
نسنهلر ترپشمهدن اؤزيئرينده
فيكيريم قيريم قيرتيق، فيرلانير باشيم شهري
ساوارلار دايانمادان داريخيرسادا، موتورلار اؤزيئرينده
ايللرگلركن سوووشور
گونلر ترپشمهدن اؤزيئرينده!
بورا ايل دؤنومو دوراغي
ائو ائشيك تر تميز، سوپورولوب ژورناليستلر
گوندهليكلر اؤزيئرينده
ائمئيللر،بير داش دوشوب قويويا، وئبسايتلار قيرجانير
باساماقلار اوزانمادا اوزانيرام ايچيمه
دام دووار اؤزيئرينده،
ايل دؤنومو دوراغي سيلينمهدن سيپ سيمان
سؤزجوكلرقوپ قورو سؤيود آغاجي!
آخيب آخماديغيني بوراخ،
بولاغجيك اؤزيئرينده!
گونش، اؤكيانين بوغولدوغونو قوسدوغوندا
اوفوقلار يئره يامالي
داغ داش قان ايچينده،
شهرلر دنيزلر
دنيز لر قان چاناغي!
شوملاييرام كؤهنه له پيرلره
نه بير ال اوزانير
داها، نه بير سس!
**
فيكيريم چاتلاق قالا دوواري
بؤجكلر بويومو اؤلچمه ده
نه بير تقويم، نه ساهات،!
سؤزجوكلرسوسسادا دميرلري،
سوواراجام ديليمده، گؤيرتيلري!
بؤيوك آرزيلار سوسدورولاسي دئييل
"چارلز ديكنز"
سو سودان آخسادا
داش داشدا دايانمادا راحات!
نه ميس هاويشام، نه، ساهات!؟
یوزکره بیر ، بیر کره یئتمیش،
سیلینسه ده آر. کییو،
پئنتاگونون بئینیندن
سوکاکلاردا سئوگییه سئویندیییمیز
سیلینه سی دئییل خیاوانلاردان
***
ایز لریمیز بیرر بیرر قوووشاجاق
ایستر زندان کؤشه سی، ایستر سینما سالونو
سئوگییه سئویننلر یاشایا جاقلار!
***
دوشما نین اؤزوم – اؤزگه سی،
یوخدور یولداش
ایلانین آغیدا چالا بیلر قاراسیدا،
بویولون سونو،
سئوگییه سونولاجاق.!؟
یاغمور دنه جیکلری سرین-سرین دنله ییردی
پنجرنین شوشه سینی
گیزلی جه یوخوما گیرمیشدین،
دوشونوردوم ساچلارینین قارانلیغینی
لامپالارین ایشیغیندا!
اللرین اری د یردی ساچلاریمین قارینی
اوره یینین ساجیندا،
گؤزلرین-گؤزلریمده گؤیرمه ده
سئوگی تارلاسینی،
اؤکسوزلوک تیکانی بوروموشدو
دایانمیشدین گئجه لیییمده!
سسینی ائشیدنمه دیم
یوللارین یورولمامازلیغینی دویدوم
لامپالارین ایشیغیندا!
ایندیسه
قولاقلاریمین اوشاقلیغیندادیر
سسینین سمفونیاسی،
گئت ائوه،
گله جم آخشام!
گئجیکمیش گئجه
گئجیکمیش گئجه دیر
تانریلار سرخوش
اودالار سوبا قوخویور سادا
قوشلار دان ماهنیسی اوخویور
آغاجلار یوخودا
دام دو وار داریخیر
کیمیسی دایانیب
کیمیسی قاچیب
پنجره لرگونش دئیه
قوللارین آچیب!
توالئتلرده شهرلر
شهرلر پارکلاردا
گنج ایچینده گنجلر!،
آتیلمیش اوغلانلار
توتولموش قیزلار
یاریم یانچاق بیر آغ گونو آغلایانلار
هئچ نه اولمایالی
بوراسی باش کند،
باشسیزلار اوجاغی
گولد دئمزدن قودوقلانیر
کوئیسچیلار
بیر اتک دولوسو بوشالیر باشیمیزا
آت قاتدا شوشه له نیر صنعتیمیز
شوشه سیز پنجره لر
شوشه لر توم توستو
ایشسیز دئییل کیمسه،
کیلاشینکوفلار،سیم سییاه سیمینوفلار
سو ایچیر آزادلیغی سوروجولر
یول اوزونو زورولداییر زوراکیلیقلار
بورادان باشلانیر سوروملولر سوروسو
یارلانیر یاریمچیلیقلار
قایماقلاییر سوزولموش سؤزجوکلر
کیملیکسیز کلمه لر
نه دئییب دینله مه لر
قازئتلار گونده لیکلر
خاطیرلانیر خاتین قیزلار
شیللاق آتیر آریق شیطان
یورومجولار یوراجاقلار
یارامازلار یورولمازلار
چک اوزاندیلار
قیریلمازلار قیریلدیقدان،
اوزاندیلار
شاپا شاپ تؤکولدولر باشیمیزا
بیر ال بیر باش،
یولداش منی...؟
!؟
گونش دوشگون جه سینه گؤیون تاوانیندان بویلانیردی
یئلین چاغریلمامیش هئکلینی پاییزین ایلنجه سینده گؤروردوم.
او، داریخدیریجی دوروم، منی قبریستان اوزه ریند کی بئی ممی باغینا چاغیردی.
اورادا، اوزون اؤمورسورن بیراریک آغاجینین دیبینده اوتورارا ق یئلین قارشی سیندا چیرپینان بیریاپراغا زیللنمیشدیم.
پاییزین سویوق کؤکسونده دیرچلن یابانی یئللرین اووولتوسوندان یاپراغین یاناغیندا هئوا یئتیشمیشدیر.
منیمده یورغون فیکیریم یارپاق قازئتی نین ان یاشیل واراقلاریندا
مهله نیردی...
شیمشکلر شکیللندی شیشمان بولودلارین اوریی پاتلایاراق آغاجلارین دیبینه اولدوز الندی
یاپراقلار بیرر- بیرر خیالیمین بوش لوغونا سیغیندیلار.
او،های- کویده، " آغا بئی " آریق بیریاپراغی باغرینا باساراق اویوموشدو!
اویاتدیم
اویانمادی!؟
ایلک دؤنه
سرین بیر گئجه ده
گوموشوپنجردن
بویلاناراق
شیلتاق اولدوزلارین
گؤزلریندن
باشلاندیق!
سوسقونلوغون
سؤندورمیه جک
سازاغی،
پنجره میزدن
بوگئجه!؟
گئجه نی چاخیر کیمی باشیما چکیب اویوموشدوم!
دمیرپاپاقلی کوچه لامپالاری،
سووئتلر بیرلییینین سالداتلاری کیمی کئشیگه دورموشدولار.
سازاق،
دیرک تئللرینین چالقی سینا قیش ماهنی سینی اوخویوردو!
آجی بیرشارقی یوخوما شیریلدادی.
هؤوله سک قالخدیم،
قاپیلارقاپالیدی لامپالار سؤنوک،
تئل آغاجیندا باشسیزبیر گؤوده گولوردو!
چالیشقان گنج،
یاشام سالخیملارینی درمگ اوچون دیره گه دیرمانمیشدیر
گؤزلری قاماشاراق الینی اوزالدیب اؤلوم سالخیمینی دره ر کن
باشی ایاغینا کئشیگه دورموشدور.
سالداتلاردیکسینرکن قاچمیشدیلار
یالنیز چالیشقان او گنج، بیرده قارانلیق اوگئجه ایدی،
بیرده کی،
اصفهان شهری!؟
گونده لیکلرده،
جیمجیلاق سؤزجوکلر
من،
بو شهرین آلنینا باسیلمیش
کؤهنه بیر دامغایام
سئوگی،
قولاقلاری کسیلمیش
سیسقا بیر،
کوچوک
سن،
دجل بیر اوشاق
بیر الینده بیر نئچه داش
بیرالینده بیر پارچا،
قورو لاواش
من،
قورباغا گؤلونه داش آتیلان
بیریسی
گؤزلریم پیشیک
قوخوسادا
توختایاسی دئییل کوچه لرین،
زینگیلتیسی!؟
گؤودمده گؤیرنلر بوسبوتون بایراق
ترسینه دوشونورم موزیکلری
کوچه لر چیلپاق
خیابانلار یورقون
سینمالار قالابالیق
بئینیمیز دولور- بوشالیر
اللریم اوخونمامیش رومان!
فیلیمین سونونوکیمسه
بیلمه ییر
سئکانسلار دئییشیلمه ده
گؤزلریمی گؤینه ییر ایلکین
ایکرانلار
تیریبونلار بهشتله نیر
زاغ- زاغ اسیر اؤلولر
کاسئتلر سیدیلنسین دئیه
حالقا- حالقا سؤکولور
تئروریستلر
جهننمچیلر یئنیلنمه ده
باشلاییر بدلچیلر
سیرا- سیرا دایانمیشیق
ساغ اللریمیز بوم – بوش
بیر الینده رئکلاملار
بیرالینده،
باشیمیز، ایاغیندا،
داخماجیقلار قارا پالاز!
آغیزلار دادسیز!
اؤلومون دادینی
دیریلر بیلیر.!
اوبا کؤچوب یورد اولاییر
قوزقون گودور قورد اولاییر
دردلی سوسوب درد اولاییر
هوروت – هوروت باخیر داشلار
داشا دؤنوب سانکی باشلار
دیل دایانیب گؤز دانیشیر
خیالیمله سؤز دانیشیر
من بیرمسه یوز دانیشیر
هوروت – هوروت باخیر داشلار
باش ایاقدی بوردا، باشلار
یاغمور یاغیب یئر قوخویور
هؤرومجکلر تور توخویور
من آغلیرام یئل، اوخویور
هوروت – هوروت باخیر داشلار
کیم کیمه دیر، آ یولداشلار
توپراقلاری قاتمیش اینسان
سئوگیلیسین آتمیش اینسان
سون دوراغا چاتمیش اینسان
هوروت – هوروت باخیر داشلار
اوز ایچیندن آخیر داشلار
من گئدیرم یول دایانیر
دول بوشالی قاتارلانیر
بیلمزایدیم، داشدا قانیر
هوروت – هوروت باخیر داشلار
داشدان آخیر، قانلی، یاشلار
اؤلورم،
باتی شافاغینی باتان،
اؤلومو
قانیمدا قودورانماز
قاراکؤپکلر
اورییم کور چیبان
دئشیلسه ده
ایماژلاریم داغیلاسی
دئییل
اللریم آپ آیدین
بارماقلاریم دان ایشیغی
دوداقلاریم دوغوشافاغی
گؤزلریم گوزگولر قبریستانی
مزاریم،
گونش چیچه یی
دوشونر منی،
آغ روزلارین دوراغیندا
دوشونر!؟
گلنده بیرچاناق گونش گتیر
یاغیرسا گؤزلریمیز
بولاقلاریمیز قورویوبدور
اوددوتوب یانیر باغ باغچامیز
اورمان خزل تؤکور
بوداقلاریمیز قورویوبدور
گلنده بیرچاناق گونش گتیر
هئچ توستوده چیخماییر
باجالاریمیزدان
سؤنوب یوردوموزون
آلووو!
اوجاقلاریمیز قورویوبدور
گلنده بیرچاناق گونش گتیر
بیرجه دان اولدوزودا درممه دیک
گئجه نی!
بو قدر بوش قالیب چؤلمک
دوواقلاریمیز قورویوبدور
گلنده بیرچاناق گونش گتیر
قوراقلیق داریشیب کند_ شهره
بیرایستی چؤرک قوخوسودا
سئویندیرمه ییر بیزی
تا باقلاریمیز قورویوبدور
گلنده بیرچاناق گونش گتیر
قیسیربولودلارهیس قوروم
قوسور
اوزگؤزوموزه
بیراود بؤجه ییده یولوخماییر
بیزی،
گئجه اوزونو!
یولاقلاریمیز قورویوبدور
گلنده بیرچا ناق گونش گتیر
کؤچموشوک بیر- بیریمیزدن
کؤکسوموزده ایلان مه له ییر
کوسوب نفسلریمیز
قوجاقلاریمیز قورویوبدور
گلنده بیرچاناق گونش گتیر
اؤلکه میزده قیشدی،
سازاق... !
گنج بیر ایشچی
چالیشیر دوواری دوواردا اونو!
* * *
سوفاژین بؤیرونده یئنی بیر سرگی
دوداقلاری هیپاتیت دوغورور
گؤزلری، محببت
سئوگی بیر ایستکان ایستی چای
ایچیب اؤلسه یاخشی دیر
ایچمه ییب،
اؤلسه!؟
ماوالئتلرین داماغی
خییار شورقوخویور
کیلینیکسلرین باکیره لییینده
مانکنلرین اوفولتوسونوآختارما،
ییغ جئبلرینه کاندوملارین بایاغینی
پوفله مودئرنیزمین ائرته سینه
بیر نئچه سینی
هوروشنلر سئویشسینلر!
ائششکلری آی آپارسین!
قودوقلاری شئیطان!؟
آجیمتیل گؤرورم
خیرداجابالیقلاری
اوره ییمده تاپماجالار
دؤیونور
دوزنلیکلردویونله نیر
داریسقال هاوانین
گؤزلرینده
اورتاق دوشونجه لر
سیلینیر
بئینیمین گوزگولویوندن
قاییدیش قاپیلاری
قاپالی
گئییملریم اوزانیب
اینجارسیزگئدیش
نیه گرکدیر؟
شئعیردیلیم،
پاسلانمیش قیلینجین
تییه سیندن جالانیر
بوزقورد،
دونه نه قدر
سیلدیریم قایالارین
رفیندن،
ایلدیریملاری اوولاییردی
بویون،
زیروه لره دومان
چؤکوب
قوردلارین گؤزلری
ایشیلداییر!
هله ده اوزاناجاق
بویوللار،
دونوق یوخولار
گؤزلریمی سوزولمه ده
تؤوشه ییراولدوزلار
توتقون گؤیلری،
بئزمه لییم قانادلاریمدان
اولایلارین شیرین لییینی
آجیلاشیرام
پاسلی بیر گوزگویه
بنزه ییرم
موربویالارین قارشیسیندا،
قورخورام،
باخیشلاریم کوته لیر
بللی دیرایزیمیز!!
بللی دیریوللار!!
توزاناقلی بیرتوی
هاواسیندایام
آغیرائللرقیزی
کؤینه یی،
قیپ قیرمیزی
کؤمورلمه کؤینه ییمی
اوخودوقلارینی
سایاقلاییرام
هله،
بئینیمیزده کهکشانلار
یوللانیر
اوشویورم یوخولاریم
قاچیر
پامبیق کؤللارینا
ایلیشمیشم
بوغازیم آجیشیر
بوکووشه نی قالقانلار
قونوشوب یوللاراوزونو،
هوسله نیرم جانیم
قاشینیر
گؤزلریمه کؤچور
اوبالار
یوللارداشینیر
بارماقلارین،
زیروه لره اوزا نیر
بللی دیرایزیمیز!!
بللی دیریوللار!!
شئعیر ایشیغینی بوراخمیشدیم
سئوگینین دومانلیغیندا،
گئجیکمیش شهرله
اوز اوزه گلدیم
بوتون دارغینلیغیم گؤیرمیشدیر
شهرین گؤی گؤزلرینده
اؤزومو ایتیررکن،
داغیلدیم
خیاوانین دارماداغینلیغینا
سوپور،
سوپوررکن،
سوپورممه دی
داغیلمیش عوصیانلاریمی
گؤیرچینلر
بیرر بیرر
دنله دیلر!
جین دمیردن قورخماسا دا !
دهشت آخیر گؤزلریندن بو شهرین
هیسلی سیسلی هاوا بوغور
یاشیل اورپک آغاجلاری
چیچک چالمیش گول چیچکلر
چؤپور باخیر پارکلاردان
یامان سوسوب قارانقوشلار
اوچوش حسسی دویونله نیب
تام قوشلارین اوره یینده،
گؤیر چینلر ایستمه دن باجاریبلار
سس سیز لییی
چالاغانلار بیه نیبلر
سوموکلرده دالدالانان
خام ایلییی !
بیر قوش دوشوب میدانچادا
چوخدان اؤلموش
گؤزلر باخیر
من دور موشام باشی اوسته
پیرپیزلانمیش تورتوکلری قانادلانیر
گؤزلریمدن
باشیم ایچی طلاتومده
آلوو دوغور
کؤزلریمدن
هئی چالیرام داشا سینمیر !
من زامانین شوشه سینده
کیریخمیشام
سوسوب زامان،
اودا،
دینمیر
شهر منده - من شهرده
ایتمیشیک بیز لاپ زهرده
سینیب سئوگی قالدیریمین قابار چالمیش
سینه سینده
شوشه کیمین
خیاوانلار قارشی دوروب آرابایا
هر نه وارسا سانکی یئییب
هیدروژئنه بومباسینی
بویون شهر
چوخ بنزه ییر
خارابایا !؟
ییخیق اودالاردا دیرچلن
یازچیچه یی
مین پاییز سارالدیم
دوشونجه
یاپراقلارینی
شهرین دامارلاریندا دویونن
یاشام
اورپه یین اوزومو
قان آغلامادا
سیرا – سیرا دایانمیش آغاجلار
بوی چکمیش بینالار
گونشله گوزگوله شن شوشه لر
قان قیرمیزی قالدیریملار
دوشونمه ده!
بارماقلاریم اؤلوقوش
سریلیب
یئره!؟
